• Email : design@sajidholy.com
  • Phone : (+91) 9030 455 365
Theme-logo

how to protect oneself from oppression

ZULM O SITAM KA SAAMNA

Aaj mulk ke halaat tang hain aur logo me bechaini, ghabrahat aur insecurity ki feeling payi jaati hai. Isi tarha duniyabhar me jaha kahi musalmano ki aabadi hai, waha kuchh na kuchh masaaib aur mushkilaat se ummat dochaar ho rahi hai. Logo me tanaw hai, darr aur khauf ka mahol hai.

Zulmo sitam hote hain to log sadko par aa jate hain, isse kya haasil hai? Protest, demonstrations aur rallies nikalna naa to islam ka tareeka hai, naa salaf ne yeh maukif ikhtiyar kiya aur naa isse kuchh badalne wala hai. Ummat ka haal tab tak na badlega jab tak log khud me tabdeeli na laye. Khud me tabdeeli lane ka kya matlab hai? Apni aur apne gharwalo ki islah karen, khel tamashe aur lahwo laeeq se ijtinab karen aur iLm hasil karne aur us par amal karne par tawajjoh de. Fahashi, uryaniyat aur layaani bato se gurez karen. Gunaho se tauba karen aur huqooq ul Allah aur huqooq ul ibaad me kotahi na karen. Faraaiz ke sath sath nawafil ke ehtemam karen aur subha wa sham ke azkar ki pabadni karen. Isi me ummat ki kamiyabi aur kamrani hai.

Allah nawazne wala hai, zaroorat hai ki ummat hath utha kar dua mange, naa yeh ki jhande aur hoardings aur signboards le kar politicans ke darwazo par khade ho jaye. Humne (saltanat e mughalia ne) 700 saal is mulk par huqumat kar ke dekh li. Naamo nishan mit gaya, phir angrez aaye, unhone to hamari tehzeeb aur tamaddun ko nahi apnaya, ulta unki language aur unka libas hum par ghalib aa gaya.

Humne siyasi parties bana kar dekh li, leadership aur qayadat aur iktedaar hasil karke, parliament me aawaz uthanege, kuchh to hasil hoga, lekin afsos kuchh nahi mila. Zillat, pasti, rusvayi aur bad'haali hamara muqaddar bani.

Ek waqt tha jab log chand aur suraj ki pooja karte the tab Ibrahim alayhis salam uthe aur kaha ki yeh chand aur suraj hamare mabood kaise ho sakte hain jo khud doob jaya karte hain. Jise mabood mana jaye us par bhala koi research kyon karega? yeh Islam ki den hai aur Islami tasavvur hai ki suraj aur chand bhi research ki chiz hai, Allah ki makhlooq hai, phir astronomy aur space technologies me musalmano ne sarbulandi haasil ki, lekin hum apne maazi ko bhula baithe.

Zaroorat hai ki hum phir waise hi musalman ban kar dikhlayen jin musalmano ko Allah ne jungo me fatehyaab kiya tha, jin musalmano ka khauf Allah ne kaafir ke dilo me paiwast kiya tha, jin musalmano ki madad ke liye farishto ka aasman se nuzool hua aur jo duniya wa aakhirat me kamiyab ho gaye.

Shaikh Zafarul Hasan Madani

Jabbar aur Kah'haar, yeh Allah ke woh naam hain jo Allah ke gusse par dalaalat karte hain, lekin asma wa sifaat ke baab me ek naam aisa bhi hai jo Allah ke gazab ke sath sath Allah ke aadil hone par dalaalat karta hai aur is naam ki azmat ko jo samajh gaya use sukoon e qalb hasil ho jayega, in sha Allah, aur woh naam hai Al-Muntakim, yani inteqaam lene wala.

Hum bebas aur lachar insan hai, hamari koi taqat koi bisaat nahi ki hum zaalimo se unke zulm ka hisab le saken, Allah jab intekam lene par aaye to phir socho ki un zaalimo ka kya hashr hoga? Zaroorat hai ki hum sab se pehle apne nafs ka muhasiba karen aur phir Allah ki huzoor me gidgidayen aur rujoo karen, phir zaroor ba zaroor madad aayegi, jis tarha Musa alayhis salam ke liye paani me raasta bana, jis tarha ibrahim alahis salam ke liye aag thandi ho gayi, jis tarha ababeel ka lashkar utra.

Agar hum namazo ke auqaat me bistar se chimte rahe, apne cash counters na chhode, sairo tafreh karte rahe, halal haram ki tameez na rakhen aur deegar kabeera gunaho me mubtala rahe, aur phir yeh tawakko rakhe ki hamare liye ghaib se madad aayegi to bhala kaise aayegi?