• Email : design@sajidholy.com
  • Phone : (+91) 9030 455 365
Theme-logo

Putting the Controversy Back into Unity

Ikhtelaaf me Ittehaad

Ummat ke ander mukhtalif baton ko lekar kabhi gharelu satah par, kabhi khandani satah par, kabhi shahar, kabhi mulk to kabhi baynul aqwami satah par ikhtleaf hota rahta hai, aur hota rahega, kyonki ummat me ikhtelaf na ho yeh Nabi sallallahu alahi wa sallam ki woh dua thi jo qubool nahi hui. Isi ikhtelaf ke sabab Nabi sallallahu alahi wa sallam ko shab-e-qadr ki tareekh bhula di gayi (aur woh bhul jana khair ka bayas tha). Ikthelaf sahaba ke darmiyan bhi hua, lekin har conflict aur difference of opinion ko deal karne ke liye ek maqool tareeka apnana hoga, hame chahiye ki ikhtelaf ko inteshar ki hadd tak na le jayen.

Kahi zaati bughz ki wajah se, kahi jamato jamiat ke ohde aur mansab ki wajah se, kahi kisi ki baat pasand na aane ki buniyad par, koi kisi aalim ki taarif kare, aur koi kisi shakhsiyat ki tarafdaari kare is buniyad par, kahi ek doosre par tanz, ek doosre par bohtan tarashi, ek doosre ki private discussions ke screenshots le kar, us par comments karna aur ilazam'tarashi karna, koi kisi ko bura bhala kahe, naye naye ilqaab se nawaze aur sar-e-bazar kisi ki izzat ko social media par uchhale, yeh bahut zyada aam ho gaya hai aur yeh chiz musalmano ke us khaas giroh ke ander bhi panapti chali jaa rahi hai jo khud ke salafi aur ahlul hadees hone ka dawa karte hain.

Kaun sachcha aur kaun jhoota hai, kaun munafiq hai aur kaun sachcha imanwala hai, kaun haq par hai aur kaun baatil ka sath dene wala hai, yeh alag baat hai, lekin agar hum seerat par ghaur kare to pata chalta hai ki Abdullah bin Ubay jaise munafiqo ke sardar ke sath bhi Nabi sallallahu alahi wa sallam ne itni narmi barti ki jab uska shar inteha ko pachuch gaya aur jab usne ummul momineen Ayesha Raziyallahu anaha par bohtna tarashi ki to Umar radiyallaho anho use qatl karne ki ijazat mangne lage, to Nabi sallallahu alahi wa sallam ne aisa karne se mana kiya take ummat me ittehad aur ittefaq qayam rahe, warne naye musalman yeh galatfahmi paalne lagenge ki hum apni hi masaajid me apni hi safon me khade rahne walo ko qalt kiya karte hain. Phir uski maut par apna kurta bhi diya aur janaze ki namaz bhi padhayi (yeh aur baat hai ki uske liye dua na karne ka huqm naazil ho gaya).

The Prophet (peace and blessings of Allaah be upon him) said: “Render back the trust to the one who entrusted it to you, and do not betray those who betray you.”

Narrated by al-Tirmidhi, 1264; classed as saheeh by al-Albaani in Saheeh al-Tirmidhi.

Shaikh Zafar Ul Hasan Madani-حفظه الله ne bade hi dardmandana lehze me kaha tha, "Kitne afsos ki baat hai ki woh log jinka manhaj ek hai, aqeeda ek hai, jo apne aap ko ahlul hadees kehte aur salafi kehte hain, unke ander bhi tafarka'baazi aur ek doosre ke khilaf bughz, keena aur hasad phailta ja raha hai, shaitan sirat al mustaqeem par baitha hua hai, aur kisi na kisi tarha woh hame ek doosre ke khilaf bhadka kar hame barbadi, halaqat aur gumrahi ki taraf le jaa raha hai."

Baat dar'asl yeh hai ki social media ke zariye ek doosre par tanqeed karna, cold war ki shakl dena aur apni salahiyato ka aur waqt ka (galat) istemal karne din bhar isi bewaqoofana amal me masroof rahna shaitan ki ek ajeeb chaal hai. Shaitaan iblees to itna experienced villian character hai ki usne Adam alayhis salam ko bhi bhatkaya, Yaqoob alayhis salam ke beto ko bhi bhatkaya, hum aur aap kis khet ki mooli hain?

Jab Nabi sallallahu alahi wa sallam ke paas ek aisa shakhs aata hai, jise uske qabeele ka sab se bura aadmi mana jata hai, to usse bhi Nabi salllallahu alahi wa sallam bade hi ba'akhlaaq aur ahsan andaaz me pesh aate hain.

Problem ka solution yeh hai ki log ulema ki sohbat zyada se zyada ikhtiyar karen, fatwe baazi aur ilzaam tarashiyan band karen, doosro par ungli uthane se pehle apni girehban me jhaanke, iLm hasil karne ki taraf aur aakhirat ki tayyari ki taraf tawajjo den kyon ki jo mar gaya uski qayamat to wahi waqe ho gayi. Waqt bahut tezi ke sath guzar raha hai (taqarrub az zaman) aur har guzarte hue lamhe ko ganimat jaan kar logo ko chahiye ke agar facebook, twitter, whatsapp aur youtube unke liye khair ke bajaye shar ka bayas ban rahe hai to unke haqq me behtar hai ki apne accounts ko hi delete kar de.